Ea mai dolava na Turaga na iTaukei ni Waluvu Ratu Jese Ranatunivono ena siga e nanoa, Tusiti 10.3.36 ena dua na soqo lagilagi ena vale ni bose ni yasana e Veitalacagi.

Era a dabe na turaga ni vanua o Naitasiri ena kena qaravi na veiqaravi vakavanua vua Taukei ni Waluvu, ni bera ni ra qai kerei vakavanua me ra sa laki dolava na valenivolavola.

E vakaraitaka na Turaga na Roko Tui Naitasiri, Ratu Waisake Tuisese ni sa dua na gauna balavu na kena vakayagataki tiko na valenivolavola e Vunidawa ka sebera tu ni vakavoutaki mai na gauna sara ea tokitaki mai kina mai Naduruloulou me laki dabe e Vunidawa.

Ia sa qai kena matanicagi donu ena siga e nanoa ni oti e rauta ni ono vinaka na vula na kena vakavinakataki na valenivolavola.

Era a vakaitavi ena cakacaka oqo na Mataisau ni noda vanua mai na Mataivalu ka rauta ni $200,000 vakacaca na dola taucoko na levu ni kena isau.

Era a tube kamunaga talega na turaga ni yasana o Naitasiri ena nodra vakavinavinaka vei ira na mataivalu ena vuku ni kena sa mai qaravi rawa na itavi levu oqo.

Na valenivolavola ni Yasana o Naitasiri esa itikotiko tudei ni veiqaravi ena vuku ni nodra qaravi na 16 na tikina ena loma ni Yasana.

Oqo e wili kina na Tikina o Naitasiri, Vuna, Viria, Navuakece,Rara, Nabaitavo, Waidina,Soloira, Matailobau, Waima, Lutu, Nagonenicolo, Noemalu, Muaira, Nadaravakawalu kei Naboubuco.