“Dua la na siga ni cola qele” – Na ibole nei Ra Mana.
E mai cava na soli ni Yasana o Rewa me baleta na kena vakailavotaki na nodra vuli na gone ena loma ni yasana ena dua na delana cecere ni mai kumuni rawa kina e $67,620.00 mai na vei tikina ena loma ni Yasana.
Ea vakayacori na soli kei na veivakararamataki ena tabana ni vuli duidui eso era rawa ni laki kuria kina na nodra vuli na luvei Rewa.
Ea vakayacori na soqo oqo ena na ena mua ni macawa sa oti, Vakaraubuka 21.11.25 kei na siga Vakarauwai ena rara ni koronivuli e Burabasaga.
Era a dolava na soqo siga rua oqo na Marama Bale na Roko Tui Dreketi, Ro Teimumu Kepa.
E vakaraitaka na nona vakavinavinaka na iliuliu ni Bose ni Yasana o Rewa, Ro Macanawai Mataitini ki vei ira na vei koro ena loma ni Yasana ena kena tokoni tiko na vuli ena loma ni yasana.
“E kainaki ni o Rewa e vanua ca ka dau luvuluvu wasoma. E segai na kena Ulunivanua. Ia, eda vakavinavinaka ena nodra raiyawa na noda qase kei na veiliutaki vakavanua ena veigauna sa qima, ni rawa ni da vakalasuya na tikina oyameda raica nai tabatamata oqo ni tiko e rua na noda Ulunivanua – na LOTU kei na VULI,” ekaya o Ro Macanawai.
“Vinaka vakalevu na veiTikina kei na veikoro qima sara, ena veika eda sa rawata. Rairai totoka na noda veibolabola, veilomani kei na cakacakavata, enai naki cecere ni kena tokoni na nodra vuli na luveda ena Vuli-Torocake (Tertiary Education) ena 2026.
“Ena veika lelevu sa rawa qo, sa rawa ni na tekivutaki tale na veivuke ni yasana kina vuli ena yabaki mai oqo. Eda na qai namaka me ratou na qai kaciva na noda komiti ni Vuli ena yabaki mai oqo, me sureti kina na nodra kerekere na luveda.
“Kevaka eda na qarava vakavinaka, ena rawa kina na bula sautu kei na tiko vinaka ena veisiga ni mataka. Sa rokovi saka tiko kina nai tavi ni Lotu. Sa nuitaki ena noda sasaga oqo, me tokoni na vuvale, ena vuli,” ekaya o Ro Macanawai