E sa tosoya na nona sasaga na iTaukei Resource Owners Forum me na tuvaka ena vuku ni kena sagai me vueti na veikabani ni Yasana ena noda vanua.

Oqo e wili kina na kena vueti cake na vei tikina edau luluqa ena veika e qarava na kabani ni yasana.

Kena ikarua na kena vueti me rawati na veivuke vakailavo(loan) ka dau vakarautaki mera vukei kina na kabani.

Ikatolu na veiwasetaki ni vuku, kilaka kei na vakasama ena vuku ni kena cicivaki vinaka na bisinisi, na vakaqaqacotaki ni kena vakamuri na ivakarau ni cicivaki ni bisinisi (compliance) kei na kena segati na veivakatorocaketaki kei na veivakadeitaki ni bisinisi me baleta na veisiga ni mataka.

Oqo e rogoci ena nodra bose vata na veimata mai na veikabani ni yasana ka vakayacori tiko e Nadave ena siga Tusiti kei na Vukelulu 23-24 ni Jiune, 2026.

Ea vulagi dokai ena kena dolavi na veivosaki kei na veisemati oqo na iVukevuke ni Kovana ni Baqe ni Maroroi Yau ni noda Vanua (Reserve Bank of Fiji) o Esala Masitabua.

E na nodra vosa ena idola ni veivosaki e vakaraitaka o Masitabua na vei yaloyalo duidui ni veika e lako curuma tiko na Baqe ni Maroroi Yau ni noda Vanua me yacova tiko mai na yabaki oqo, 2026 kei veika e lalawa kina ena veiyabaki ni mataka.

Na vei kabani ni yasana era matataki ena veitalanoa oqo e wili kina o Ba, Bua, Cakaudrove, Kadavu, Nadroga, Naitasiri, Namosi, Tailevu kei Ra.

Na iTaukei Resource Owners Forum e nodra matabose na Turaga na iTalai na Minisita ni Veikavakaitaukei, Hon Ifereimi Vasu ka ra lewena tiko na vei tabana ka veiqaravi vei keda na iTaukei ka wili kina na Fijian Holdings Limited, iTaukei Trust Fund Limited, iTaukei Land Trust Board, iTaukei Affairs Board kei na koronivuli ni veivakarautaki e Nadave.