Savulelele.
Oqo na yacani savu ka kilai tani kina na koro o Nabalasere, ena Tikina o Saivou ena Yasana o Ra.
Na koro qo o Nabalasere e tiko sara yani ena loma ni vanua, ka veiyala talega kei na Yasana o Ba ka vakakina na Yasana o Naitasiri.
Na Savu oqo e nodra isakisaki na koro o Nabalasere, ka vakatokayaca kina na Yavusa ena loma ni koro me Yavusa Savu.
Eda qoroqoro ena kena irairai kei na kaukauwa ni wai ka tasova tu mai ena delanivanua ka ra sa vakila tiko na kena veivakalougatataki na lewe ni koro e Nabalasere.
Ena yasa ni savu era tasova tale tu ga mai kina na vei gusu ni wai ka ra basika mai ena lalaga vatu e Savulelele.
Era vakaraitaka na lewe ni koro ni ivakatawa ni savu oqo e rua na Ganivatu ka rau vaka qara voli ena lalaga vatu oqo.
Na ganivatu oqo esa I vakatakilakila tale tikoga ni nodra manumanu na Yavusa Savu ena koro o Nabalasere.
Ea lai sikova na nomuni Matabose ni Veikavakaitaukei na savu oqo ena siga Vakaraubuka, na ika lima ni Tiseba. Oqo ni oti e dua vuli ka vakayacori vei ira na lewe ni koro ena nodra veiqaravi vei ira era dau lai sarasara ka sili ena savu totoka oqo.
Na vuli oqo e biuta vata na Matabose ni Veikavakaitaukei kei na kabani na Rosie Holidays, ka ratou kena dau ena nodra vakarautaki na dau veiqaravi(service provider) kei na veivakasarasarataki (tour guide) vei ira na saravanua era dau gade mai Viti, ka ra via sarava saraga na noda iYaubula ka ukutaki tu kina na noda vanua.
Era lewe 20 taucoko na lewe ni koro o Nabalasere era sa tauri vola mai na Rosie Holidays ni oti na nodra vuli siga tolu.
Na vuli oqo e vakarautaki ena kena sagai me vakaqaqacotaki ka vakavinakataki cake na nodra qaravi na noda vulagi saravanua era dau gade yani kina koro.
Na vuli oqo e okati kina na nodra ivosavosa, isulusulu kei na veigacagaca kece sara ni veiqaravi era nanamaki mai kina na vulagi saravanua.
E tiki talega ni vuli oqo na nodra vakararamataki ena iwalewale ni kena vakayagataki vakamatau na ilavo era rawata mai ena kena vakayagataki na nodra iYaubula.
E dua talega na tabana era vulica ena veiqaravi oqo na kena sauvaki tiko na vanua kei na itikotiko vakaturaga me vakavurea na veilomani kei na duavata ena kena cicivaki vaka vinaka na bisinisi ni koro.
Ni oti na vuli, e semati tale na komiti ni saravanua e na loma ni koro ka na raica tiko na veigacagaca kece sara era na dau qaravi kina na vulagi saravanua e na lomanikoro.
E vakaraitaka na ivukevuke ni turaga ni koro e Nabalasere, o Kositino Seru na nodra vakavinavinaka na lewe ni koro ena kena nanumi na nodratou delaniyavu me kau yani kina vuli oqo.
E vakaraitaka ni sa tiko vei ira eso na kila ia na vuli oqo ena laki laveta cake tale na veiqaravi era dau vakayacora vei ira na vulagi saravanua.
Ena gauna vata talega oqo esa biuta vata tiko na kabani na Rosie Holidays e dua na ituvatuva vei ira na vulagi saravanua ena vei vanuatani me ra mai taleva eso na veikoro vakaviti ka mai vakadinadinataka talega na kena iyaubula.