Sa vakadeitaki o Ratu Semi Vukivukinavanua Lotawa Nadakaibitu me Turaga na Tui Yakete. Oqo ni oti na nodra mai vakagunuvi ena vatu ni veibuli ena loma ni koro o Nalotawa ena colo kei Ba.

O Ratu Semi, yabaki 36, e sa vakadeitaki vaka Matanitu mai vei iratou na Tabana ni Veitarogivanua kei na Wai ni Qoliqoli ka cabori talega vakalotu ni oti na veiqaravi vakavanua ka vakayacori vei ira.

E duatani na veivakagunuvi e vakayacori oqo vua na Tui Yakete ni ra mai dabe ena yavu kara a taracake na qase ni vanua me ra dau vakagunuva kina na Tui Yakete.

Era a vakaisulutaki mai loma ni nodra itikotiko o Namaravulevu ni bera ni ra kauti koya yani na Sauturaga kei na nona Bati ki na vatu ni veibuli me laki gunuva na yaqona vakarautaki.

Ea tuberi talega vei ira e dua kamunaga ena vuku ni kena tataunaki na vanua,wai kei na tamata ena vanua o Yakete.

Ena imatai ni nodra vosa vei ira na lewe ni vanua e vakaraitaka na nona vakavinavinaka ena vuku ni veiqaravi levu era oga kina na lewe ni vanua me vakadeitaka na nona sa cabeta na tutu vaka veiliutaki.

E veivakadeitaki talega o Rt Semi ka kaya ni qarava sara na nona itavi ena kena ivakatagedegede e vinaka me ra kune vakacegu tiko kina na lewe ni nona vanua.

O Ratu Semi esa ikalima ni Tui Yakete me buli ka vakadeitaki vaka vanua. Na iotioti ni veibuli ea vakayacori ena yabaki 2009 ena nona a buli o Ratu Savenaca Tiqe Nadakaibitu na nodra turaga itubutubu.

Na tikina o Yakete e wili kina na koro o Nalotawa Yaloku Rara, Nanuku, Tukuraki, Tabataba, Naivilawa.