E a vosa tiko o Tudravu ena Bose Levu Vakaturaga ka veivakararamataki tiko vei ira na lewenibose ena vuku ni veiqaravi ka sa vakaitavi taki koya tiko kina na Tabana ni ovisa ena vuku ni waigaga ni veivakamatenitaki.

E tomana ka kaya ni tiko saraga ena vuvale na kena vakaqaqacotaki na iwali ni leqa ka sa tara tiko na noda vanua ena gauna oqo.

“E sega ni tiko ena tabana ni ovisa na iwali leqa, na iwali ni noda leqa e tiko sara tiko ga ena vanua eda tiko kina.

“Au kerea kina me vakaqaqacotaki na veika me baleti keda, baleta au kila mai vuniyaloqu kevaka sa matata vinaka ga e dua na vuvale, dua na itokatoka dua na mataqali, sa basika ena dua na koro ka drodrova yani na tikina kei na yasana ka sa teteva sara yani na noda vanua.

“Au vakavinavinaka taka saka kina ni sa tekivu vakaqaqacotaki mai na tikina oqo baleta e mai tara saka tiko na gacagaca ni veiqaravi ni Tabana ni Ovisa,” ekaya o Tudravu.

E tomana ka kaya o Tudravu ni da sa tiko oqo ena dua na gauna ka sa viritaki na veika kecega vei iratou na tabana ni ovisa

“Au mai kerea tiko kina na nomuni veitokoni, veivakasalataki kei na veivakadeitaki ni sega ni wali ni leqa e tiko ena tabana ni ovisa,” ekaya o Tudravu.

E kaya ni dodonu me da sa na cakacaka vakaveivolekati sara ena kena sagai tikoga me tarovi na vei bolebole eda sa lako curuma tiko ena gauna oqo.

E tomana ka kaya nisa lako curuma tiko ena gauna oqo edua na imusu ni gauna ka yavalati kina vakalevu na veika eda dau mareqeta na itaukei.

Ka sa tiko na vakanuinui ena Bose Levu Vakaturaga ena kena cakacakataki na maroroi ni veika eda vakamareqeta na kawa iTaukei.