𝗦𝗶𝗴𝗮 𝗗𝗮𝗺𝘂 𝗮 𝗩𝗮𝗻𝘂𝗮.
𝗗𝗼𝗹𝗮 𝗻𝗶 𝗕𝗼𝘀𝗲 𝗻𝗶 𝗬𝗮𝘀𝗮𝗻𝗮 𝗼 𝗠𝗮𝗰𝘂𝗮𝘁𝗮.
𝗡𝗮𝗯𝗼𝘂𝗼𝗻𝗼, 𝗨𝗱𝘂.
E vakadewataka na iliuliu ni Bose Yaco, na Paraiminisita ni noda vanua o Hon. Sitiveni Rabuka vei ira na lewe ni Bose ni Yasana o Macuata ni gadreva na Bose Levu Vakaturaga na nodra nanuma me baleta na nodrau vakarau laki sota ka veivosaki na BLV kei na vuvale vakatui mai Peretania.
Ea vosa tiko o Rabuka ena nona dolava na Bose ni Yasana o Macuata ka vakayacori ena koro o Nabouono e Udu ena siga Vukelulu 29.10.25.
E vakaraitaka ni sa vakanuinui tiko ni na vakarautaki vakamatau e dua na pepa ni veika e nanuma na yasana me na kau cake ki na Bose Levu Vakaturaga.
E tomana ko Rabuka ka kaya ni dina ni vanua dredre na vanua era vakaitikotiko kina ena Tikina o Udu, ia e levu sara na tamata qaqa era kune mai ena loma ni koro o Nabouono ka vaka kina na ena loma ni tikina.
E vakaraitaka talega na nona vakavinavinaka vei ira na lewenivanua ena vuku ni nodra vosota tiko na tatara malua tiko yani na veivakatorocaketaki ena yasa i Macuata oqo.
Era vakananumi talega na gonevuli mai na Udu District School ka ra sarava tiko na veiqaravi me ra maroroya tiko na itovo vakavanua ka kilai tani kina o Udu, me vaka era sarava tiko ena veiqaraqaravi.
E tini na veiqaravi vakavanua ena dua na meke wesi ka vakarautaki vakatabakidua ena Bose ni Yasana oqo, ka ra vakaitavi kina na lewe ni koro o Nabouono kei na koro veiwekani veivolekati ena tikina o Udu.
E 105 taucoko na koro ena loma ni yasana o Macuata ka12 na kena tikina.
Na tikina o Udu e tiko sara ena ucui Vanualevu ka coka vaka kina Vualiku, e wili ena tikina oqo na koro o Vunikodi,Nabouono,Nukudamu,Nukusa kei Cawaro