E na siga nikua Vukelulu nai ka 29 ni siga ni vula ko Okotova era dolava kina na matai ni siga ni Bose ni Yasana ko Tailevu na Turaga na Minisita ni Qele ni Matanitu – Honourable Filimoni Vosarogo.
E na nodra mala ni vosa e vakaraitaka ko Hon. Vosarogo na kauwai ni matanitu ena vuku ni kena sa tubu vakatotolo sara na levu ni kisi ni HIV AIDS ena noda vanua. E ra vakaraitaka ni kauwai ni matanitu ena dodonu me tiko ni nona kauwai na yasana.
E ra vakaraitaka ni rau veisemati na tubu ni mate ca kei na kena sa vakayagataki vakasivia na waigaga ni veivakamatenitaki.
E ra kuria ni valenibula mai St. Giles e tara me nodra vakatabakidua na tauvimate ni mona ka sega ni vanua e ra qaravi kina na vakaleqai ena waigaga ni veivakamatenitaki. Na kauwai oqo e kau mai ena loma ni yasana ko Tailevu ke rawa ni okata me tiki ni nona veitalanoa ena bose siga rua.
E ra vakabibi taka talega ena nodra veidusimaki ena vuku ni kena lako curumitale tu ga na vula e dau vakananumi kina na mate na “breast cancer” ka veivakauqeti ena nodra gole totolo na noda marama ki valenibula ni se lailai na mate. E tataunaka na bibi ni nodra maroroi na marama ka ni okati ko Viti me dua na vanua e tu taudua kina cake na nona wiliwili ni kisi ni veivakalolomataki.
E bibi na nodra itukutuku ni ra veibolei saka ena loma ni yasana ena nodra veivakadeitaki ni kevaka sa na rawa ni dei ko Tailevu ena kena valuti na veibolebole eso, ena rawa ni dei ko Kubuna ka dei talega kina ko Viti.
E tiki ni nodra mai vakaitavi na nodra vakaraitaka na kena sa ciqomi ka sa vakadonui na kerekere ni matabose ni yasana ko Tailevu ena vuku ni dua na tiki ni qele ka tiko ena yasa ni taoni ko Nausori ka tiko na kena ituvatuva me sa koro ni yasana ko Tailevu. Oqo e salamuria talega na kena sa suka e vica na qele kina loma ni Mataqali ko Nailagobokala ena loma ni yasana ko Tailevu.
Na bose siga rua ni yasana vakaturaga ko Tailevu e qaravi ena loma ni koro vakaturaga ko Buretu ena tikina ko Buretu ka okati kina na koro ko Naivakacau,Matainoco,Daku kei Nabouciwa.