Sa oti vinaka e 106 na yabaki sa qai mai vakadeitaki tale vakavanua na itutu nona na Turaga na Tui Yale e Kadavu ka kena icavuti vakaturaga, ki Naivibati vua na Turaga Tui Yale.
Na itutu oqo e sa vakadeitaki kina vaka matanitu ka vaka vanua talega o Ratu Navitalai Litidamu.
O Ratu Navitalai edua ea veiqaravi ena tabana ni bula ena noda Matanitu ka vaka kina ena tabana ni bula ena Matabose kei Vuravura, na World Health Organisation.
Ea qaravi na soqo bibi oqo ena macawa ni kena vakananumi na tu vakatakikoya o Viti ena 10 ni Okotova ena nodra dela ni soso e Rakiraki, Yale e Kadavu.
Ea qaravi taumada na kena lotu ni bera ni ra qai vakagunuvi vaka vanua.
E vakaraitaka na Mata ni Tikina o Yale,Waisea Ravono ni sa dua dina na siga ni marau ena loma ni Tikina ena kena sa qaravi rawa na soqo bibi oqo.
E vakaraitaka o Ravono ni sega ni dua vei ira na lewe ni yavusa oqo e se bula donuya na veivagunuvi ka se vakayacori sara ena 1919.
Ka qai mai vakayacori tale ena yabaki oqo, 2025, ni oti na nodratou veivakadeitaki na Tabana ni Veitarogivanua, Wai kei na iQoliqoli.
E tomana o Ravono ka kaya ena loma ni Tikina o Yale e 6 taucoko na kena yavusa ka 2 mai na loma ni koro o Rakiraki.
Na Tikina o Yale e ratou wili kina na koro o Rakiraki,Gasele, Nauciwai, Levuka kei Naioti.

Photos: Isi Production