Oqo ni oti na kena mai vakavinakataki na vale oqo ka sa cicivaka tiko ena gauna oqo na kabani ni yasana na Tailevu Holdings Pte Limited.

Ea curumi ena siga edaidai na valenivolavola vou ka vakayacori edua na kena lotu ka cabori kina na vale kei ira na ivakalesilesi mai vua na iTalatala qase ni wasewase o Bau, Joji Rinakama.

Na noda vale oqo na Ratu Cakobau House ea sobu taumada na kena duru ena 41 na yabaki sa oti ena vula o Epereli, 1984 ena dua sasaga rai yawa era a vakaitavi kina na marama ni yasana o Tailevu.

Era a solesolevaki ka ra solevutaka na kena taraicake na vale oqo me vaka eda sa mai raica tu ena siga nikua.

E rauta ni dua vinaka na yabaki na kena vakavinakataki tiko na vale oqo. E $3.8milioni na isau ni veika e qaravi me tekivu mai na daunivakasala ki na kena tara na vale oqo.

E ratou sa tu vakarau na valenivolavola ni yasana me ratou qaravi kemuni na lewenivanua e Tailevu, ena vale ka vakatokayaca vua na Turaga Vunivalu sa bale o Ratu Epenisa Seru Cakobau.